O artista betanceiro Francisco Martínez-Pin inaugurou este luns, 2 de marzo, a exposición “Volta a mar a Betanzos: baleas, cachalotes, peixes & barcos”.
A súa inquedanza polo mundo plástico e artístico acompáñao desde a infancia, aínda que non é ata 2018 cando decide dar un paso máis, afondando na elaboración das pezas e na intención conceptual que sustenta cada unha destas suxestivas creacións.
A obra de Pin constitúe unha singularidade persoal, estreitamente ligada ao seu pensamento e aos seus ideais arredor da concienciación medioambiental. A reutilización de residuos —recollidos nas praias, nas beiras dos ríos e mesmo nas rúas— convértese no eixo central do seu proceso creativo. O artista outórgalles unha segunda vida, máis duradeira ca a anterior, combinando unha clara intención estética cunha potente mensaxe de fondo.
Os materiais empregados nas súas pezas proceden maioritariamente das praias da comarca de Betanzos —O Pedrido, Miño ou O Regueiro—, así como de achegas de vivendas particulares de veciños e coñecidos: portas antigas, restos de electrodomésticos, azulexos e outros elementos en desuso que atopan unha nova funcionalidade a través da arte.
A colección que acolle o Museo das Mariñas é unha reflexión plástica sobre a biodiversidade mariña. As baleas e os cachalotes son os protagonistas, acompañados doutras especies, maquetas de embarcacións e paisaxes mariñas realizadas en diversos soportes e técnicas, configurando un conxunto que convida á contemplación e á conciencia ecolóxica.
A mostra estará aberta ata finais do vindeiro mes de maio.
