O pasado 15 de maio tivo lugar a terceira xuntanza dos profesionais vigueses do sector da documentación. A Biblioteca de Betanzos, por medio do seu director Ángel Arcay, foi a entidade convidada para dar a conferencia inaugural da actividade.
Club de lectura sobre a historia de Betanzos
Co gallo de ser a biblioteca que mereceu o Premio á Innovación Bibliotecaria de Galicia no pasado ano 2023, achegámonos a Vigo para explicar o proxecto que mereceu tal recoñecemento: o club de lectura sobre a historia de Betanzos orientado a persoas maiores de 65 anos en situación de soidade non desexada.
Entendemos que unha das virtudes do noso proxecto é a facilidade ca que pode ser exportado a outras cidades, permitindo aos profesionais dos arquivos e as bibliotecas replicar este club de lectura cos materiais propios de cada institución.
Museo MARCO de Vigo
A xuntanza, que tivo lugar no Museo MARCO de Vigo, contou ca participación de profesionais procedentes de todo tipo de institucións da cidade: a Biblioteca da ONCE, a Biblioteca Xosé Neira Vilas, a Biblioteca da Universidade de Vigo ou o propio centro de documentación do Hospital Álvaro Cunqueiro.
