Vimos de recibir no Arquivo Municipal de Betanzos unha nova doazón de documentos.
Trátase dun importante fondo do Patronato Benéfico Docente dos irmáns García Naveira. Este patronato era o órgao de xestión e administración das obras ideadas por Juan e Jesús García Naveira, que permaneceu activo incluso despois da morte dos irmáns.
Acompañan a este fondo diferentes escrituras relativas á adquisición de terreos para realizar a obra das Escolas e o Asilo da Avenida Jesús García Naveira, así como documentos sobre a herdanza de Jesús, o irmán pequeno, que faleceu accidentalmente na Arxentina en 1912.
Esta doazón, efectuada por Antonio Gómez-Iglesias Casal, débese a que o seu pai Valentín Sánchez-Iglesias Puente formou parte deste padroado, conservando na súa residencia a documentación da institución.
En total, a doazón está composta dos seguintes documentos:
• Tres copias do Regulamento das Escuelas García Irmáns (1915)
• Borrador e orixinal do rexistro da propiedade do edificio das Escolas e Asilo García Irmáns
(1930)
• Escritura de cesión en precario das Escolas García Irmáns ao Concello de Betanzos (1967)
• Copia da escritura de cesión outorgada por Juan García Naveira e outros do Asilo García
Irmáns á Congregación de las Hermanitas dos Ancianitos Desamparados (1912)
• Borrador de datos referentes á testamentaría de Jesús García Naveira e a súa esposa Carmen
Echevarría
• Libro de actas da Fundación Benéfico Docente García Irmáns, do 31-12-1940 a 19-09-1967
• Libro de actas da Fundación Benéfico Docente García Irmáns, do 26-08-1908 a 02-12-1916
• Libro de actas da Fundación Benéfico Docente García Irmáns, do 02-01-1917 a 28-08-1940
• Libro de actas do Consello Escolar Primario da Fundación Benéfico Docente García Irmáns
(1958)
• Escritrura fundacional das Escolas e Asilo García Hermanos (1908)
• Escritura de cesión por parte do Concello de Betanzos do terreo para edificar as Escolas e
Asilo García Irmáns (1906)
• Escrituras de doazóns de terreos para edificar as Escolas e Asilo García Irmáns (1908-1909)
• Escrituras de compra de terreos para edificar as Escolas e Asilo García Irmáns (1908-1911)
